پنجابی پوٹھواری پوٹھوہاری پہاڑی شاعری
سلام نذرانہ
شہرِ علم نی بلنی لاٹ تے روشن سوچاں آلے نیں
نبیﷺ نی آل اولاد اے تائیں پکے کرماں آلے نیں
نبیاں نیں سردار اے نانا اے سردار شہیداں نیں
رب نے خاص الخاص اے نالے اچیاں شاناں آلے نیں
نبی نی اکھ ناں چاننڑ نالے شیرِ خدا ناں شیر وی اے
حق نی خاطر جان لٹائی گے ایسیاں لجّاں آلے نیں
کوثر نے اے جاماں آلے خیراں بنڈنے آلے نیں
لِسیاں نیں غمخوار وی نالے مہر محبتاں آلے نیں
انھاں نیں ناں صدقہ دئی کے لوک مُراداں منگنڑ
رب ناں فضل وی دُونڑا لبھے ایسے قُرباں آلے نیں
رہنڑی دنیا اسنی کوئی ہور مثال نی لبھنڑیں
ایسے ہٹھاں آلے شمسہ ایسے صبراں آلے نیں
شمسہ نورین
No comments:
Post a Comment
Note: only a member of this blog may post a comment.