کلاسیکی پنجابی شاعری
وطن
سر سانجھاں سردار وطن
دکھ سکھ دا غم خوار وطن
گلشن سدا بہار وطن
قومی ہار سنگار وطن
جنت دا گلزار وطن
قومی مان تراناں والا
اچیاں عزتاں آناں والا
ذاتی شاہیاں شاناں والا
زوراور مختار وطن
جنت دا گلزار وطن
انڈونیشی ترک ایرانی
چینی شامی عرب اردانی
سارے دل دے محرم جانی
سب یاراں دا یار وطن
جنت دا گلزار وطن
آون سارے پریم پجاری
تگڑے مارے ہاری ساری
بن کے یار ازماون یاری
ہارے کدی نہ پیارا وطن
جنت دا گلزار وطن
ہر رنگ ایہدا گورا لاکھا
میرے لئی اے اکو آکھا
میں ایہدیاں آناں دا راکھا
میرا پہرے دار وطن
جنت دا گلزار وطن
ڈردا نہیں میں جان نہ جائے
وطن میرے دی آن نہ جائے
دلوں فقیر ایہہ مان نہ جائے
دل دا اے بلکار وطن
جنت دا گلزار وطن
ڈاکٹر فقیر محمد فقیر
No comments:
Post a Comment
Note: only a member of this blog may post a comment.