لُٹ کے لے گیا اے گھر اج کوئی بھرے بھرے
کندھاں، بُوہے، باریاں لگن ڈرے ڈرے
جِنہاں نُوں میں چانن گھول پیائے سن
اوہناں توں نہ اک کِرن وی سرے سرے
ویلے دے سورج توں برفاں ورھیاں نے
شہر دے سارے منظر لگدے ٹھرے ٹھرے
سچ بولن دا شوق سی چڑھیا مینوں وی
ایسے لئی میں پتھر کھادے کھرے کھرے
ویلے دے منصور اوہ کنج سداونڑ گے
رہندے نے جو سُولیاں کولوں پرے پرے
بسمل! کول ہے کشتی بودے کاغذ دی
تیز نے چھلاّں، کویں سمندر ترے ترے
غلام مصطفیٰ بسمل
No comments:
Post a Comment
Note: only a member of this blog may post a comment.