پنجابی سرائیکی شاعری
جیلے ہے مسیت اپڑی تے راہ آپڑاں ہووے
ہر کہیں دا اصولاً تاں خدا آپڑاں ہووے
مقصد ہے تاں مقتول دے گل ہار وی ہوون
مطلب ہے تاں قاتل دا چُھرا آپڑاں ہووے
گھنڑی ہے تاں گھن تول کے ازمیش لہو دی
کھو آپڑاں جے کر ہے بھرا آپڑاں ہووے
ایڈا وی نہ بد بخت مسافر کوئی تھیوے
ہتھ مار کھلووے تے بوہا آپڑاں ہووے
ڈوجھاں دے نکھیڑے دی خوشی آپڑی جاء تے
لگدا ہے پتہ جیلے جدا آپڑاں ہووے
تھوڑا ہے یا بہوں آپڑاں پھر آپڑاں ہوندئے
جے سیر پرایا ہے تاں پا آپڑاں ہووے
تُھڑ پوندی اے ہر مانگویں شئے وقت توں پہلے
تاں مال رکھیندا ہے جے گھا آپڑاں ہووے
کہیں نال محبت دا ظہیر انت ایہا ہے
سڈ یار دا آوے تے الا آپڑاں ہووے
ظہیر احمد مہاروی
No comments:
Post a Comment
Note: only a member of this blog may post a comment.