پنجابی سرائیکی شاعری
نہ چھُٹدے چاک سینے دا نہ کُھٹدے ساہ سفر میڈا
خبر نئیں کِن تیں ٹُر گیا ہے او سانول بے خبر میڈا
اَوارہ بے سہارہ ہک اندھارا ہاں خلا وانگے
نہ کُئی اسمان چھت میڈی نہ کئی دھرتی ہے گھر میڈا
توں آپیں بول میں تیڈے لباں دے طاق کیوں کھولاں
زبان تیڈی قسم تیڈی نہ توں میڈا نہ در میڈا
ونجا دے سیندھ زلفاں کھول نہ تاں ڈھیر یاد آساں
جو ہے اے کہکشاں میڈی گلی میڈی شہر میڈا
سریراں لیر تھیاں اینجھیاں جو ہر احساس مر گیا ہے
نہ انگ سنگ نال کئی سانگا نہ شیشے نال شر میڈا
میڈے اندر دا خالق مر ونجے ہا خود کشی کر کے
میکوں مجبور کر گئے چُپ رہن تیں صرف ڈر میڈا
خدا دے ناں تیں شاہد اج تاں میکوں بہر آنون ڈے
ودا پُچھدے پتہ ہک شخص کلہا در بدر میڈا
عزیز شاہد
No comments:
Post a Comment
Note: only a member of this blog may post a comment.