پنجابی سرائیکی شاعری
ساکوں ایویں سُنڑ
جیویں کہیں توں وچھڑیا کوئی سنڑدائے
ادھ رات کوں غزلاں نصرت دیاں
ساکوں ایویں منگ
جیویں اندھے اکھیں منگدے ہن
جیویں گونگے صرف الا منگدِین بیاہ کیا منگدین
ساڈا ایویں تھی
جیویں پوہ دی رات گزار کرائیں
کوئی دھند ایچ لوہندا ڈینھ تھیندائے
ساکوں ایویں پڑھ
جیویں جھوک تے شام کوں بھاء تے بہہ
پڑھے چھیڑو دوہڑے طارق دے
ساکوں ایویں رو
جیویں کہیں کو روونڑ حق بنڑدائے
یعقوبؑ رُنئے جیویں یوسفؑ کُوں
ساکوں ایویں جی
جیویں پھانسی لگدا شخص کوئی
جیوے آخری رات دے ساہ ساہ کوں
ساکوں ایں سُنڑوا
تیڈی سُنڑدے ہوئے ساڈے ساہ نِکلین
تیڈی جان چُھٹے
ساکوں ایویں سڈ
جیویں دریا بُڈدا شخص کوئی
کہیں ناں دا آخری سَڈ مارے
ساکوں چھوڑ ایویں
جیویں کہیں دے ہِکے آکھے تے
ویھ سال دی سگریٹ کوئی چھوڑے
ساکوں ایویں مل
جیویں مل مزدور کوں مل پوون
کٹھے ڈونھ تنخواہیں عید اُتے
ساکوں تروڑ ایویں
جیویں اجڑی گھوٹ دی میت تے
مارے دھاڑیں، ونگاں تروڑ پِٹے
ساکوں مار ایویں
جیویں کہیں وسوں دے پُتر یکے
کوئی حملہ آور مار گھتن
ساکوں ایں ورتا
جیویں اپڑیں ساری شاعری وچ
ہک باہو ہُو ورتا ڈکھلائے
ساکوں ایویں پُنڑ
جیویں پُتر جوان دی میت تے
کوئی پُنڑدائے اپڑیں قسمت کوں
حاتم بلوچ
No comments:
Post a Comment
Note: only a member of this blog may post a comment.