جدید پنجابی شاعری
شاعر ہاں پر سوکھا نہیں کجھ کہن گلابی پُھلاں تے
میری سوچ دے اکھر فِٹ نہ بہن گلابی پُھلاں تے
آس دی دیوی تھوڑے چِر لئی ایتھوں مُکھ پرتایا کیہ
رانی بن گئی مایوسی دی ڈین گلابی پُھلاں تے
ایہ وی پک اے توں نہیں اڑیئے پیر بغیچے وچ رکھیا
فر وی کاہنوں تیرے جھولے پین گلابی پُھلاں تے
ہاسے ہاسے وچ اج اوہنے بُلھ چُھوا کے ایہناں نوں
کر چھڈیا اے جگ توں بھارا دین گلابی پُھلاں تے
وِرلا ای کوئی بنیا ہونا نور کسے دی اکھاں دا
اکثر پیندے ویکھے احمد وین گلابی پُھلاں تے
علی احمد گجراتی
No comments:
Post a Comment
Note: only a member of this blog may post a comment.