جدید پنجابی شاعری
پلس تے آرمڈ فورسز دے جواناں واسطے نظم
سویرے عید ہے سُنیائیں
سلام ہووے بھرا جی نوں
سنا مختار کے حال ہے
تے گھر کوئی نہوں گیا بیلی؟
ایتھائیں ڈیرے جمائی بیٹھائیں
کیویں حالت ونجائی بیٹھائیں
سویرے عید ہے سنیائیں
او بسم اللہ تے خیر ہوے
سلامت توں وی رہیں شالا
چا کے پُچھیائی بھرا سوہنا
میں کیوں ڈیرے جمائی بیٹھاں
تے حالت کیوں ونجائی بیٹھاں
میرا ماہنگا سُناواں تن
آ بہو ایکھاں دساواں تن
تِرے آون توں پہلے جھٹ
وڈیری فون کیتا ہے
مِرے ماہنگے دا کے حال ہے
اوہدے تِھبکاندے ہوٹھاں دے
بُلارے میرے کنّاں تائیں
جداں اپڑے تاں ہاں ٹھریا
سکوں ملیا سواد آیا
تے نال ای امّاں آکھے پئی
پَتہ وی ہے کہ نئیں تینوں
ایہہ ذی الحج دا مہینہ ہے
تے موسم رل کے باہن دا
سہارا لے کے ویہڑے وچ
گھنے پِپّل دی چھاواں دا
کَھڑے بھیناں بھراواں دا
پُتراں دا تے ماواں دا
ایہ ویلا اُنہاں بالاں دا
جہڑے کھیڈن وی بُھل گئے ہن
جہڑے بُوہے تُوں بَہر آ کے
کَھلو کے اُچّے تھلّے تے
سڑک تے دید لائی رکھدن
مِرا کلیا ڈکھائی رکھدن
مِرا پُھمن
پتہ وی ہے کہ نئیں تینوں
سویرے عید ہے سُنیائی؟
وطن توں دور ہِن جتنے
بشر مزدور تے افسر
اوہ سارے گھر نوں ول امسن
تے توں بچڑا؟
امّاں میں وی آ ویساں
توں ناں ہُسڑ مِری جنّت
پتہ وی ہئی ملازم ہاں
تے راکھا اپنی دھرتی دا
مِرے پنڈے تے وردی ہے
مِرے سر تے ذمہ داری
توں انج کریں جوں نِکّے نوں
مِرے طرفوں روپیے دہ
ڈبک چوں کڈھ کے دے چھوڑیں
تے لاڈو بھین میری نوں
شبیر اوراں دی ہٹی توں
مہندی، پونی تے کیچر
اخائیں لئے کے دیویں تے
مِرے کھاتے لکھا چھوڑیں
تے امّاں میں وی آ ویساں
چلو عید آلے دینہ ناں سہی
دووے دیہنہ وی ڈیوٹی ہے
تریے دینہ دا وعدہ ہے
ضرور آساں ضرور آساں
ایہو کجھ آکھ کے اس نوں
میں اپنی گل مُکا چھوڑی
اڈیک اچ ہم جوں اماں داؤں
کوئی ولدی تاں آسیں پر
میں اپنی ہنج نہ ڈک سگیوم
مِرے کنّاں تے جس ویلے
پئی دُسکار ادھی جئی
تے بعد اچ کال کٹی گئی
ایہو ساری کہانی ہے
جدھے پاروں میں دُکھی ہاں
تے پلکاں اُتّے پانی ہے
او اچھا خیر ہے بھائیا
اُٹھیویں نہ جوں دفتر چوں
پتہ کرئیے ڈیوٹی دا
جوں کہڑی جاہ تے لگی ہے
کِسے ناکے یا سگنل تے
یا کِسّے عید گاہ دے ونج
اساں باہروں کھلوناں ہے
تے اوہ نہ ہور وی ہک گل
مِرے ذہن اچ پئی امدی ہے
جوں جنہاں واسطے اساں
چا گھر اپنا بُھلایا ہے
تے ماں پیو نوں رُوایا ہے
اوہ میرے دیس دے واسی
اوہ میرے ہم مذہب سارے
کلمہ گو سمجھ کے سُن
وڈے دینہ خدا دے عید
ملسن وی کہ نہ ملسن
مختار بلوچ
No comments:
Post a Comment
Note: only a member of this blog may post a comment.