پنجابی شاعری
کی لِکھاں
سوچی جاناں شعر کی لِکھاں
پیشاں زبراں زیر کی لکھاں
تنگی دی گل سُندا کوئی نئیں
رَج کی لکھاں ڈھیر کی لکھاں
ساڈی ہستی اک اَدھ پایہ
دَھڑیاں کِلو سیر کی لکھاں
روٹی کھو کے دھر چھڈی نیں
دُکھاں بھری چنگیر کی لکھاں
تُوں پھل کھاویں موسم والا
ساڈے وس نئیں بیر کی لکھاں
دَسدے نیں کہ چنگا اے سب
آل دوالے ہنیر کی لکھاں
آٹا دس کے دیون چوکر
حاکم ولوں مہر کی لکھاں
بھُکھ نے کیسا ناچ نچایا
سانوں شام سویر کی لکھاں
حالت اپنی بدلی کوئی ناں
بلّا تیر تے شیر کی لکھاں
اپنی بیتی لکھ چھڈی سی
ہُن جو ہوئی فیر کی لکھاں
چارے پاسے گھُپ ہنیرا
ہونی کَدوں سویر کی لکھاں
احمد تے کُرلاندا رئے گا
قسمت والا پھیر کی لکھاں
احمد شکیل چغتائی
No comments:
Post a Comment
Note: only a member of this blog may post a comment.