میں تاں آہداں ہے سرکاری رستے دے وچ ٹالہی

پنجابی سرائیکی شاعری

میں تاں آہداں ہے سرکاری رستے دے وچ ٹالہی

توں آہدیں جو تیڈے ہے پئی رقبے دے وچ ٹالہی

میں ڈٹھا ہے کندھلی دے وچ پپل تھیا ہویا

میں ڈٹھی ہے خجی آلے پھڈے دے وچ ٹالہی

انتے ڈیکھ ہاں کیویں میڈے پچھوں بھجدی آئی اے

انتے ڈیکھ ہاں گڈی آلے شیشے دے وچ ٹالہی

اج جو چڑیاں سر نیہوڑا کے دھپ دے اتے بیٹھن

میکوں لگدے لگی گئی اے آرے دے وچ ٹالہی

قسمے سچی آہدا بیٹھاں کہیں کہیں ویلے میکوں

ٹالہی دے وچ بندہ ڈسے بندے دے وچ ٹالہی

ایڈی گھاٹی ٹھڈی چھاں کوں کون ہے لمبی لیندا

ایڈی وڈی کیں ڈتی ہے چلہے دے وچ ٹالہی

کوئی نہ اینکوں کپ کے اپنڑاں ویڑھا پکا کرے

جے تئیں منشو پکھیاں دے ہے قبضے دے وچ ٹالہی

منشو بھٹہ