کلاسیکی پنجابی شاعری
سہیلیاں ول
اللہ بیلی آ، ساڈڑے کوچ ڈیرے، مل جاونا اہل سہیلیو نی
دھروہی رب دی جے اک وار میتھے، پھیرا پاونا اہل سہیلیو نی
سوہنے یار دے وس بے بس ہویا، میرا آونا اہل سہیلیو نی
گئی ورت قضا کہار ولوں، اوہدا دھاونا اہل سہیلیو نی
میری ماں نوں وَین نہ کرن دینا، جیؤ لاونا اہل سہیلیو نی
دینا اج توں چھوپ نکھیڑ میرا، چرکھا ڈاھونا اہل سہیلیو نی
میرا اج تحقیق موقوف ہویا، چھوپ پاونا اہل سہیلیو نی
گھرو گھری جا کے اک دوسری نوں، سد لیاونا اہل سہیلیو نی
اسے طور بھنڈار دے وچ بہہ کے، رل گاونا اہل سہیلیو نی
میری چوگ جے اج نکھٹ گئی، کھادا کھاونا اہل سہیلیو نی
میری جا تے کسے پیارڑی دا، پیڑھا ڈاوھنا اہل سہیلیو نی
فضل! یار نوں حال تباہ میرا، سمجھاونا اہل سہیلیو نی
سید فضل شاہ
No comments:
Post a Comment
Note: only a member of this blog may post a comment.