پنجابی سرائیکی شاعری
نویں کجھ شعر ڈکھ دے آستانے توں کڈھیساں میں
غزل کوں ہنڑ روایتی قید خانے توں کڈھیساں میں
میکوں روزی اتے تعلیم ڈوھیں نال رغبت ہے
مگر مکتب دا رستہ کارخانے توں کڈھیساں میں
سرو دے بوٹے بس تپلاں بنڑاونڑ دا نی کم ڈیندے
توں ڈیکھیں معجزہ اقراء دا کانے توں کڈھیساں میں
تیڈے ہجراں دے تیشے دی ہنر مندی سلامت ہے
ہنجھوں دی نہر اکھیں دے ویرانے توں کڈھیساں میں
اوندا دعویٰ اے لہو دے نال خط لکھدا رہیئے میکوں
اوندے او خط سویرے ڈاکخانے توں کڈھیساں میں
محبت دے فریضے وچ رفع یدین وی تھیسی
تے کجھ غدار تیڈے شامیانے توں کڈھیساں میں
اے ممکن ہے جو میڈی ذات وی خرچی ونجے ایں وچ
تیڈی ہستی کوں دشمن دے نشانے توں کڈھیساں میں
تعجب نئیں جو کجھ نانگیں دا سر کچلیا ونجے شاید
قضا دا فیض ہر خدشہ خزانے توں کڈھیساں میں
فیض بلوچ
No comments:
Post a Comment
Note: only a member of this blog may post a comment.