جدید پنجابی شاعری
وارث
جے وارث میں وارث ہوندا، جے میں لکھدا ہیر کہانی
میں قصے دی ہیر نوں لکھدا، اتھری تے انمول جوانی
جنہے ماں دا مان گنوایا، جنہے پیو دی پت لہائی
جنہے گھر وچ چور لیاندا، ما پیاں دے گھر سنھ لوائی
چُوری نالوں مِٹھی عزت، بیلے دے وچ ڈوہل گنوائی
ماپیاں کولوں جنہے کھوئی، لاڈ پیار دی سب وڈیائی
میں تے وارث کدی نہ لکھدا، ہیر نوں پیار وفا دی رانی
جے وارث میں وارث ہوندا، جے میں لکھدا ہیر کہانی
جے وارث میں وارث ہوندا، جے میں زور وکھاندا فن دا
کیدو جہے فرشتے تائیں میں وارث، شیطان نہ من دا
میں لکھدا تے اوہنوں لکھدا پہرے دار عزت دے دھن دا
جنہے پتہ نشانی دسیا گھر وچ سپ دے زہری پھن دا
کسے دی دِھی نوں اپنا جاتا اوہ سی پاک پوتر من دا
میرا کیدو مار نہ کھاندا اوہ چوراں دے گِٹے بھن دا
میں کیدو نوں انکھی لکھدا، لکھدا پنڈ دا پیر گیانی
جے وارث میں وارث ہوندا، جے میں لکھدا ہیر کہانی
رشید انور
No comments:
Post a Comment
Note: only a member of this blog may post a comment.