عارفانہ کلام حمد نعت منقبت سلام
بے بساں بے چاریاں دے دستگیراں نوں سلام
آدمیت دی ریاست دے امیراں نوں سلام
سر کٹا کے سربلندی دے گئے نیں دِین نوں
سئین زینبؑ تیرے غیرتمند وِیراں نوں سلام
تیریاں ہوٹھاں تے جمیاں ہوئیاں چُپاں تے درود
تیریاں اکھاں چوں کِردے ہوئے نِیراں نوں سلام
جگمگایا دین دا جھگا بہتّر 72 غازیاں
نکے وڈے غازیاں روشن ضمیراں نوں سلام
محترم نیں جو وی لکھدے ہین تیرے مرثیے
تیریاں سارے انیساں تے دبیراں نوں سلام
جابراں دے جبر دی بے رونڑکی تے لعنتاں
صابراں دے صبر دے انتاں اخِیراں نوں سلام
ختم ہویا ناز جنہاں تے سفر ایثار دا
فن دیاں راہواں دے اوہناں راہگیراں نوں سلام
ناز خیالوی
No comments:
Post a Comment
Note: only a member of this blog may post a comment.