جدید پنجابی شاعری
مکی زندگی
انج تے آون نوں سب آئے ساریاں دے وچ آئے
بڑھیاں اوکھیاں گھڑیاں وچ آ اوہناں ڈیرے لائے
آئے نیں ایہہ سب تھاں ہووے سدا سلام اوہناں تے
ہندی رہ درگاہ ربی تھیں رحمت عام اوہناں تے
پر کیہ کرئیے جو وی آیا جاون دے لئی آیا
ایہناں دے دم قدماں وچ ہنیریاں چانن لایا
آیا اک نرا اکو جو آون دے لئی آیا
دین دُنی دا چہرہ مہرہ جنہے آن سجایا
اکو چڑھیا جہڑا چرھ کے ڈٹھا چڑھدا جانا
دھر فرشاں تو قدم گیا جو عرشاں تیک ودھاندا
چڑھ نظراں تے سدا لئی جو وچ دلاں دے کُھبا
اوہو جہڑا چڑھیا چڑھ کے فیر کدی نہ ڈُبا
اک واری اے چمک کے جہڑا چمکاں ماری جاندا
لشکاں مار ہنیرے چانن نال سواری جاندا
ودھیا ودھ کے ودھدا جائے ودھدا جاون والا
ٹُر کے اگے ٹُردا جائے پچھاںنہ آون والا
نال ہنیریاں ڈونگھیاں کھائیاں دے وچ لڑدا جاندا
چڑھیا جہڑا چڑھ کے دسے اُچا چڑھدا جاندا
سارے جانن کویں نہ جانن ایہہ گل جانن والے
ملی کتاب جنہاں نوں گئے جو نال نبوت پالے
آہراں ادماں نال اوہناں نوں بخشی ہمت عالی
کیتی آپ خداوند تعالیٰ اوہناں دی رکھوالی
وچ گروہ پاکاں سدے ہے پر حق ایسے دا ایہنوں
نہیں ایہہ گل وسارن والی کدے وی مینوں تینوں
باجھ ایہدے ایہہ ہو وی سکے کیکر ہور کسے نوں
ٹرنی ملی نہ ایہدے وانگوں عرشی ٹور کسے نوں
پچھلیاں اگلیاں وچ ایہہ جائے اکو جیہا پچھاتا
پچھلے انجھے جانن ایہنوں جویں سی اگلیاں جاتا
وسدے دور وی ویکھے اوہنوں انجدے ملدے گلدے
نیرے اوہدے وسن والے جویں نیں اوہنوں ملدے
طلب ایہدی نوں کدی دلاں تھیں طالب بھل نہ ویہسن
ملدے نیں ایہہ جویں پے انجے ملدے گلدے ریہسن
ڈاکٹر فقیر محمد فقیر
No comments:
Post a Comment
Note: only a member of this blog may post a comment.