جدید پنجابی شاعری
آ مُڑ جُلیے گراں، گل یار سمجھ
محفل ڈُھکدی اے تاں، گل یار سمجھ
سانجھے ہاسے تے سوگ، خالص مٹی تے لوگ
ٹھنڈے رُکھاں دی چھاں، گل یار سمجھ
دھمی کُکڑاں دی پانگ، فِر چِڑیاں دا ساہنگ
شامی بولدے نے کاں، گل یار سمجھ
وکھ ہو کے نہ گزار، دِن زندگی دے چار
تُو کِداں میں کِداں، گل یار سمجھ
ہوئے سویل یا شام، ہس کے آکھے غلام
سوہنڑیا زندگی تیرے ناں، گل یار سمجھ
مینڈا چن منہ موڑ، نئیں پیسے دی لوڑ
خط لکھیا اے ماں، گل یار سمجھ
ہِک اُنج پردیس، اُتوں مزدور دا بھیس
سڑ ویندے نے ہاں، گل یار سمجھ
آفتاب چکوالی
آفتاب احمد خان
No comments:
Post a Comment
Note: only a member of this blog may post a comment.