جدید پنجابی شاعری
اوڑک بھائیاں نے قاضی نوں گنڈھ آندا
لگا رانجھے دا ہون نیاں میاں
بیٹھے پرھیا دے وچ اک جتھ ہو کے
آن پنڈ دے خورد کلاں میاں
چھیڑی گل اک پنڈ دے جنیں پہلاں
دیکھ وچ مجلس چپ چاں میاں
اوہنے کہیا بھائی ایدکی جان دیو
کہیا رانجھے دے بھائیاں نے ناں میاں
کرئیے کدوں تیکر سانوں تسیں دسو
اسیں نال ایدے کاں کاں میاں
ککھ بھن کے کدی نہ کرے دوہرا
چونی رہ گئی مج تے گاں میاں
ایہنے گھٹ خرمستیاں کیتیاں نیں؟
جیوندے سن جد باپ تے ماں میاں
جھوٹے پینگھ جہڑی اتے جھوٹدا سی
ٹٹ گئی جے اوس دی لاں میاں
کرے کم نہ کاج تے رہوے ستا
گھر تے جاتا اے ایس سراں میاں
ساتھوں نہیں ایہدے چاؤنے چائے جاندے
ایتھوں کرے ہن اپنا تھاں میاں
ساڑی دل پرتاؤندا ٹوکدا اے
اسیں ایہدے ساں پیو دی تھاں میاں
اسیں کدوں تک نبھاں گے نال ایہدے
چھڈو لمیاں کرو نیاں میاں
جاتا جدوں سبھناں ایہ نئیں ولے جاندے
ہوئے زمینن دے ول رواں میاں
قاضی لئی رسی کچھ پاؤنے نوں
اوتھوں ایں کھول کے اک تناں میاں
جوڑ ڈھینیاں وٹاں تے آن بیٹھے
بالک گھبرو پیر جواں میاں
قاضی ونڈیاں پا کے وکھ کیتی
بھائیاں نالوں بھرا دی تھاں میاں
باہیاں والیاں دا بنیاں جگ سارا
کلا رہیا رانجھا نیم جاں میاں
آئی رانجھے دے حق زمین ساری
کلر ٹوئے ٹبے بیاباں میاں
کوڑ گھٹ کر کے رانجھا چپ ہویا
ہوندا دیکھ کے صاف انیاں میاں
مہلے چھچھرے ون کریر نالے
موہڈی اک بوٹے تھاں تھاں میاں
ملے ڈھور سکے چم ہڈ تھوتھے
لگے کن پٹھے کھاندے کاں میاں
کوڑا جگ فقیر تے کار ایہدی
سچا رب رسولﷺ دا ناں میاں
ڈاکٹر فقیر محمد فقیر
No comments:
Post a Comment
Note: only a member of this blog may post a comment.