جدید پنجابی شاعری
جی او جی میرے شہر لہورا جی
جی او جی میرے شہر لہورا جی
رنگ رنگیلا چھیل چھبیلا
تیرا اک اک جی
جی او جی میرے شہر لہورا جی
ہور شہر کی تیرے اگے
تیرے وِچ اک دِیوا جگے
مُہر جتھے ولِیاں نوں لگے
کیہن نوں داتا دی نگری
تیتھوں وَدھ کے ایتھے کی
جی او جی میرے شہر لہورا جی
رُتاں آون ویلے ویلے
تھاں تھاں اُتے میلے ٹھیلے
اٹّھاں دِناں وِچ نو نو میلے
بُوہے بُوہے مجّاں گاواں
کھا مکھن تے لسیاں پی
جی او جی میرے شہر لہورا جی
چار چوفیرے پُھل پئے مہکن
سوہنے سوہنے پنچھی چہکن
تینوں ویکھ فرشتے سہکن
تیرے وچ نے لہراں بحراں
کدے نہ ہووے اُنی وِی
جی او جی میرے شہر لہورا جی
جانی جان ایں دور توں لنگھے دا
مائی باپ تُوں بُھکھے ننگے دا
رکھوالا سوہنے جھنڈے دا
تیرے ویہڑے وسدے رسدے
ہسن کھیڈن پُتر دِھی
جی او جی میرے شہر لہورا جی
تیرا جوبن شوخ جوانی
زر دولت تے آنی جانی
شہر شہر وچ پوے کہانی
ویکھیا دامن لاہور نہ جس نے
اوہنے ڈِٹھا کی
جی او جی میرے شہر لہورا جی
استاد دامن
No comments:
Post a Comment
Note: only a member of this blog may post a comment.