جدید پنجابی شاعری
وکاؤ مال
دین مذہب دے سودے سارے
ویچن پئے مذہبی ونجارے
آسے سوٹے پھوڑ مصیل
درس کوَقتے وعظ کوَلے
جبہ، ٹوپی، تسبیح، داڑھی
لاں بوکا وٹوانی داڑھی
گند سمیت طہارت خانے
ول چھل دھوکھے مکر بہانے
سیاہ عمامے پھلے پھلے
سچے تہمت طُرے کُلے
مست اکھاں سر نئی خماری
لمیاں زُلفاں جال شکاری
گھر دی فِقہ حدیث بگانی
مطلب دی تفسیر قرآنی
چوڑے متھے سنیں مُحراباں
بحثاں نال سوال جواباں
کھلھ دینی دنیاوی تنگی
بھیڑی وسوں بُھکی ننگی
عُقبیٰ نال خیال سہاندی
ناگ گناہواں بخشش واندی
رولے رپے چکاں چاہنگاں
نعرے ہوکاں اُچیاں بانگاں
سنتاں تے فرضاں دیاں ریتاں
حُجرے ممبر سنیں مسیتاں
دم جھاڑے دے بھرے پراگے
نال تویتاں، پُھوکاں، دھاگے
مولانا دا لقب سوَلّا
غوث، قطب، پیغمبر، اللہ
شاہواں جہی فقیر فقیری
راٹھاں چاری ورگی پیری
بھولیو گاہکو ساؤ لوکو
لے لئو مال وکاؤ لوکو
ڈاکٹر فقیر محمد فقیر
No comments:
Post a Comment
Note: only a member of this blog may post a comment.