پنجابی عارفانہ کلام، حمد نعت، منقبت، سلام، مرثیہ
حسینی راجپوت
جے کربل وِچ میں وِی ہوندا
جے کربل وِچ میں وِی ہوندا
تیرے غلاماں نال، کھلوندا
پنج ست وَیری ماردا، کوہندا
فیر میں موت دی نِیندر سوندا
جے کربل وِچ میں وِی ہوندا
اِک پاسے کُل جی سن بہتّر
دوُجے پاسے، یزیدی لشکر
ویہندا زِمیں اسمان نُوں روندا
جے کربل وِچ میں وِی ہوندا
تیرے خیمے سلامی دیندا
جد تُوں اِذنِ غُلامی دیندا
فیر میں اپنے عیب لکوندا
جے کربل وِچ میں وِی ہوندا
صدقے زینبؑ دی چادر دے
علی اکبرؑ دے، علی اصغرؑ دے
پَیراں تے، سِر دھر کے روندا
جے کربل وِچ میں وِی ہوندا
بد فِطرت اِبلیس دا پیڑا
پوترا، بُو سفیان دا بھیڑا
اپنے شعراں وچ، اونہوں بگوندا
جے کربل وِچ میں وِی ہوندا
جے مِل جاندا، تیرا وسیلہ
بخشیا جاندا میرا قبِیلہ
جنت وِچ مِل جاندا گھروندا
جے کربل وِچ میں وِی ہوندا
ماتم کِیتا، بی بی سکینہؑ
اتھرُو وگائے، شاہِ مدینہؐ
پا کے سِر تے سواہ میں روندا
جے کربل وِچ میں وِی ہوندا
نذرانہ دیندا، جان تے تن دا
غازی عباسؑ دا، بازُو بَنڑدا
حُر دے سجّے ہتّھ کھلوندا
جے کربل وِچ میں وِی ہوندا
کوہندے اثر نُوں یزِید دے چیلے
اپنے لہو نال، مردے ویلے
مولاؑ تیرے، پیر میں دھوندا
جے کربل وِچ میں وِی ہوندا
اثر چوہان
No comments:
Post a Comment
Note: only a member of this blog may post a comment.