جدید پنجابی شاعری
ویہل
ایہہ جندڑی کہیڑے کم دی اے
جے اینی وی سانوں ویہل نئیں
ایس غم فکراں دنیا دے
کسے سُکھ دے کنڈھے بہہ کے تے
کجھ ہس لیئے کجھ رو لئیے
کجھ داغ دلاں دے دھو لئیے
جے اینی وی سانوں ویہل نئیں
اسی ویکھ لئیے
دن کیویں پھیرا پاؤندا اے
کیویں نواں سویرا آؤندا اے
جے اینی وی سانوں ویہل نئیں
ایہہ سوچ پووے
کیویں حسن نظارے ڈھلدے نے
کیوں عشق دے بھانبڑ بلدے نے
جے اینی وی سانوں ویہل نئیں
وچ راتاں دے
اِک پل دوپل اکھاں کھولن دی
تاریاں دے موتی رولن دی
جے اینی وی سانوں ویہل نئیں
ایس غم فکراں دی دنیا دے
کسے سُکھ دے اوہلے بہہ کے تے
کوئی رُٹھری یاد منا لئیے
اونہوں نال کلیجے لا لئیے
جے اینی وی سانوں ویہل نئیں
صوفی تبسم
No comments:
Post a Comment
Note: only a member of this blog may post a comment.