جدید پنجابی شاعری
کانی سوچ
شہر میرے دے بخت پورے وچ رہندا ہاکو کانا سی
ہے سی عقلوں پورا بھاویں شکلوں ادھوانا سی
ہڈ بیتی لئی جگ بیتی دے لبھے ورتے دانے نوں
یار بنائے لبھ اچیچا کدوں اوہ بندے کانے نوں
کسے دواکھے نال نہ کھچرا کلی اکھ ملاندا سی
ہولی ہولی سب اک اکھے یار بناندا جاندا سی
وچوں وچ ای نال سیانف گھونی سوچ سیانے نے
شہر میرے دے سارے کانے یار بنالیے کانے نے
اک دن مل کے آکھیا میں اک اکھ سی قسمت یار تیری
ایہہ پر سمجھ نہیں آندی مینوں کانی سوچ وچار تیری
نال اپنے ایہہ کیہ اک اکھی لام ای لاندا جانا ایں
یاری دی کھیہ پگل پیا خود رنگے رنگ رنگانا ایں
آکھن لگا مل کوڈاں دا کیوں ہن لوگ پچھاندے نہیں
پر حکمت دے موتی باجھ صرافاں جوکھے جاندے نہیں
ہتھیں دتیاں کھولن دے لئی پیندی لوڑ اے دنداں دی
مورکھ گل نہ سمجھن سوکھی کیتی دانشمنداں دی
اپنے وانگ فقیر ایہ مینوں جد وی ویکھن چاکھن گے
کانے نیں ایہہ سارے مینوں کانا تے نہ آکھن گے
ڈاکٹر فقیر محمد فقیر
No comments:
Post a Comment
Note: only a member of this blog may post a comment.