جیہنوں آپنی پہچان نہیں اے

 جدید پنجابی شاعری

جیہنُوں آپنی پہچان نہیں اے

اوہ انسان، انسان نہیں اے

میرے دل دا حال نہ جانے

ایناں اوہ انجان نہیں اے

تیرے نال پیار کِیتا اے

ہُن کوئی ارمان نہیں اے

قدم قدم تے مرنا پَیندا

جیونا کوئی آسان نہیں اے

تُوں کیہ میرے غم نوں جانے

تیرے وچ تے جان نہیں اے

آ جا میرے دل وچ آ جا

ایتھے کوئی دربان نہیں اے

مُلّاں دا ایمان اے جو وی

اوہ میرا ایمان نہیں اے

اوتھے کئی مجنوں وَسدے نیں

صحرا تے ویران نہیں اے

سبھ نُوں اوس حیران کیتا اے

پھیر بھی اوہ حیران نہیں اے

میں کِیہ جانا کِیہ اے فرشتہ

میری جان پہچان نہیں اے

تیرا ہر اک شعر تبسم

اللہ دا فرمان نہیں اے ​

صوفی تبسم​