جدید پنجابی شاعری
اوہنوں پتر چاہیدا سی
جیہڑا اوہدے نال رہوے
بن کے اوہدی ڈھال رہوے
رب نے دُوجی، تیجی، چوتھی
تے پنجویں وی دِھی دِتی
پنجویں دِھی دی موت تے اُس نوں
تھوڑا دٗکھ سی، تھوڑا سُکھ سی
سُکھ اس لئی سی
اک دا داج بناون دی فِکر گھٹی سی
فیر رب نیں تِن پُتر دِتے
کُوجے کملے وِیراں نوں بہناں دی رِیج نہ لیندی
اک موڈھے توں لاہندی تے دُوجی چُک لیندی
دِھیاں نُوں سولہ سولہ سال کھوا کے
لُولے لنگڑے نال ویاہ کے، سر توں اپنے بھار لہا کے
اس نے محنت دُگنی کِیتی
کوٹھے پا کے، پُت ویاہ کے
زیور پانڈا، گھر دی کُنجی
نُوہاں دی چُنی وِچ ٹُنگی
پٹواری دی سیوا کِیتی
کھیتر، جُھگی پُت نُوں دِتی
سُکھ دا ساہ اوہ لے نہ پایا
اک دن وی گھر بہہ نہ پایا
خرچے سی پُتر دے اپنے
کِرچی ہو گئے سُکھ دے سپنے
پُکھ دے سپ ہر ویلے ڈنگدے
پوترے شے لئی پیسے منگدے
ہر ویلے فِکراں نے کھادا
پُتر تنگ، مردا نئیں بابا
جس ویلے موت نے جُھمر پائی
لوکاں ساہمنے پُت پان دُھائی
اندر و اندر عید منائی
پیؤ دی لاش نُوں جھپیاں پا کے
اُچی اُچی رووے دِھی
نا جا سوہنے ابا جی
میرے پیارے ابا جی
اقصٰی گیلانی
No comments:
Post a Comment
Note: only a member of this blog may post a comment.