جدید پنجابی شاعری
میں پیراں چوں کنڈے وی نہ کڈھے بیہہ وچ راہواں
ہک دو پل دی دیر ہوئی اوس بنھ لئے گجرے بانہواں
سوہنی صورت رب چا دتی لیکھ نہ سوہنے لکھے
سوہل ملوک کبوتری ورگی ڈولے پا لئی کاواں
نہ میں پھڑن دا سوچیا نہ اوہ تتلی ہتھیں آئی
میرے پیر زمین تے رہے اوہ اُڈ گئی وچ ہواواں
واء پُرے دی دے جھولے آ خُشبو نوں بھلیں پایا
پُھل وچارا سوچی جاندا میں ہُن کدھر جاواں
عشق نُوں سمجھیا روگ ممولی آپے ای گُھل جاسی
پر میریاں ہالے نکلن چیکاں کنہوں پھٹ وخاواں
دو قدماں دی دوری نوں چا دو سو کوہ بنایا
میرے ساہنویں رکھیا سی اج ہور کسے دا ناواں
ہیر کسے دی جھنگ کسے دا چل قمر ٹُر چلیئے
بن کے رانجھا چوچک دا میں چاکر کیوں کہاواں
قمر فرید
No comments:
Post a Comment
Note: only a member of this blog may post a comment.