کما لے
امیر غریب نیں بنے بھرا دونویں کوئی بادشاہ تے کوئی ہالڑی جے
کرماں والیاں نوں لبھن لال ہیرے ساڈے جیاں نوں لبھے نہ لالڑی جے
علم عقل نہ کتوں وی لبھا مینوں گلی گلی قصور دی بھالڑی جے
دکھ سکھ انسان دے نال ہندے عمر صبر دے نال لنگالڑی جے
غوث قطب وی سارے ٹُر گئے نیں واری نزع دی کسے ناں ٹالڑی جے
فرشتہ کڈ لے جاوے گا جان تیری بت رہوے گا پیا فیر کھالڑی جے
رہنا ہوش و حواس نئیں قائم تیرا جدوں ٹُر جاوے گا دلاں دا والڑی جے
گھر بار نئیں جانا ساتھ تیرے ہتھوں جاویں گا سجناں کھالڑی جے
وچ قبر دے دین گے پا تینوں کیتھوں لبھیں گا پلنگ نہالڑی جے
میرے بخش دے کل گناہ سارے تیرے در دے اسیں اج سوالڑی جے
دن رات کما لے عمل چنگے جنت لبھدی نئیں سوکھالڑی جے
پڑھیو ما الصابرین دی آیت بھائی کل مرضاں دی ایہہ رکھوالڑی جے
آخر وقت پڑھیو سورت یٰسین جان نکلے گی بڑی سوکھالڑی جے
غلام حضور شاہ مُکا کے سب قصے ہتھوں جاویں گا سجناں کھالڑی جے
غلام حضور شاہ
No comments:
Post a Comment
Note: only a member of this blog may post a comment.