جدید پنجابی شاعری
پیر فضل گجراتی دے لئی
ڈونگھے دشت سجن دے پینڈے یارا ساڈے جاگے
اوس سمند طبع دا چھیڑی رکھیا کھلی واگے
اوہ زمیاں نہ لگن جتھے غور فکر دیاں ہلاں
یارا ساڈے چوہراں پایاں تے مل لئیاں ملاں
کوئی نہ اولھے اوہدے کولوں صفت نویں پرانی
ڈیرے ہر شاعر دے رہندی اوہدی شروع کہانی
ٹک ٹک لکھے رباعیاں نعتاں نظماں غزلاں دوہڑے
یم فرحت ول دھک لیاوے پور ماں دے روہڑے
رواں زباناں اتے اوہدے مصرعے ہون دھگانے
ٹُر کے شاعر اوہنوں ویکھن آون سُگھڑ سیانے
فہم فراست اوہدی منن فہم فراست والے
رات دنیں شوقین سخن دے بیٹھے رہن دوالے
قلم اوہدی جس پاسے وگے چیر مراحل جاوے
راہ پیڑے ہموار بنائے ہر پاہندی سُکھ پاوے
یاد اوہنوں ہر ویلے کردے دل اپنے پرچاون
ساریاں یاران نوں اوہنوں مٹھیاں نچھاں آون
رے نہ ٹھلیا چامل اوہدا چھاپے نت رسالے
اک مرکز ول ٹور لیاندے سارے لکھنے والے
میداناں وچ جھنڈے گڈے ڈھولن ڈھول وجائے
لڈی حال دھمالاں پاندے نکل ہزاراں آئے
حد مُکا وکھائی اوہنے رکھی لاج وطن دی
ہری نوں سر اوہنے کیتی سکی شاخ سخن دی
مُرلی اوس اجیہی پُھوکی بیلے اگاں لائیاں
پیکے پیڈے نغمے اوہدے دیسیں دُھماں پائیاں
دار علوم اندر اوس چھیڑے پجابی قصے
نِرے ای حُب وطن دے جذبے آئیے اوہدے حصے
فیکلٹی نے دُنیائی اوڑک اوہ جیہڑا حق منگے
جیونکر ہوراں باقی صوبیاں رنگ اپنے نیں رنگے
قلعے دلیلاں اوہدیاں والے کوئی تروڑ نہ سکے
آمنا سامنا آکھن بے گانے تے سَکے
یمنوں بھریاں اوہدے اُتے پایاں کسے نگاہواں
بُلھا وارث ہاشم حافظ اوہدیں پُشت پناہواں
رہسی مستی گھٹی ہمیشہ فضل کلام اوہدے دی
یاد رہوے گی رنداں تائیں گردش جام اوہدے دی
ڈاکٹر فقیر محمد فقیر
No comments:
Post a Comment
Note: only a member of this blog may post a comment.