جدید پنجابی شاعری
اکھ وچ ٹھیکری پہرہ جاگے
دُکھ سوویں تے سُفنا جاگے
اکو رات چہ عمر گزاری
تھوڑا سُتے، بوہتا جاگے
میں نُوں میں دی جاگ لگاواں
میں دا ہوند حوالہ جاگے
اکھ وچ اوہدی بھلک دا سُفنا
ادھا سُتا، ادھا جاگے
لوں لوں سُرت نے ات مچائی
عشق دا دیوا جگیا، جاگے
ہُن نہ گھوکدے عشق ترنجن
ہُن نہ کدھرے چرخہ جاگے
سدھراں نُوں نیندر پے جاوے
یاں کوئی درد اولا جاگے
سُفنا موت ویاہون آیا
ہتھ وچ زہر پیالہ جاگے
دل دی نکڑ والے گھر دا
ساری رات بنیرا جاگے
ہو سکدا اے بشریٰ کل نُوں
میری تھاں کوئی دُوجا جاگے
بشریٰ ناز
No comments:
Post a Comment
Note: only a member of this blog may post a comment.