جدید پنجابی شاعری
رُوپ جہدے دی اکھیں ویکھی سدا بہار چمن دی
بلبل جان رہی کُرلاندی خاطر اوس سجن دی
ویکھ اوہدے ول وچ چمن دے وٹ سنبل نوں پیندے
لپٹ جہدی لٹ کُھلی وچوں آوے مُشک ختن دی
ہونٹھاں اوہدیاں دی تک سُرخی سُرخ یاقوت گواچا
جوہریاں دی وچ نظرے اڈی لالی لعل یمن دی
نین جہدے تک ودھدی جائے نرگس دی حیرانی
ویکھ اوہدے و شرموں ہووے نیویں اکھ ہرن دی
شوخی نظر اوہدی نہ کیتا دور ہنیر نظر دا
شاموں فجر تیکر وچ اکھاں ول لگی جس چن دی
جھاکے کدی نہ کھولے میرے اوہدیاں نیم نگاہواں
کدی تے نال میرے اوہ لڑدے کدی تے وگڑی بنڑدی
لب تک صبراں آون نہ دِتا بن جس نوں فریاداں
دبی رہی اوہ ترلے لیندی سدھر وچ من دی
جس دی شوخ محبت مینوں لکھنے شعر سکھائے
سُن کے اوس فقیر کدی نہ دِتی داد سخن دی
ڈاکٹر فقیر محمد فقیر
No comments:
Post a Comment
Note: only a member of this blog may post a comment.