جدید پنجابی شاعری
روز دیہاڑی بُھکھ دے ہتھوں
چُلہے دے وِچ ہڈیاں ساڑاں
بال دا روونڑ ویکھ نہ سگاں
جا کے کندھاں دے وِچ لگاں
اَگ چُلہے دی بُجھدی جاوے
کوئی نہ میرا درد ونڈاوے
کیہڑا جُرم ہویا اے ربا
میرے دُکھاں تے درداں دی
تیرے تاٸیں اواز نہ جاوے
نظماں غزلاں لِکھیاں ہوئیاں
بَھج کے الماری چوں لبھاں
چُنڑ چُنڑ کے فیر ساریاں کڈھاں
ڈِھڈھ دی اَگ بُجھاونڑ دے لٸی
اپڑیں ہتھیں پاڑی جانواں
چُلہے دے وِچ ساڑی جانواں
کدی وی اوہنوں رونڑ نہ دیساں
بُھکھا بال نوں، سونڑ نہ دیساں
رفعت انجم
No comments:
Post a Comment
Note: only a member of this blog may post a comment.