جدید پنجابی شاعری
اکھ مِری دے کاسے اندر خیر کسے نہ پایا
جھلیاں سداراں روپ نگر دا ہر بُوہا کھڑکایا
آس مِری دے کھیتر اُتے کوئی کَنی نہ وَسی
اِنج تے بدّل ہاٹھاں بَن بَن کِنی واری آیا
دُور دُراڈے رہنے والیاں بُکاں بھر بھر پِیتا
میں دریا دے کنڈے تے وی بیٹھا رہیا ترہایا
دُھپے سڑدے ہوئے اس رُکھ دی خیر کِسے نہ منگی
ہر راہی نُوں جِنھے اپنے سائے ہیٹھ بٹھایا
اووا نے اج میری رہ وِچ سینہ تان کھلوتے
کل جِنہاں نُوں انگلی لا کے ٹُرنا اساں سکھایا
سچی گل لطیف نے کہہ گے میاں محمدؒ ہوری
’’نیچاں دی اشنائی کولوں فیض کسے ناں پایا‘‘
منشی لطیف گجراتی
No comments:
Post a Comment
Note: only a member of this blog may post a comment.