جدید پنجابی شاعری
تھاں تھاں پھرِیاں دُنیا اُتے بُھلدا پر اِک پاسہ نئیں
لکھاں چہرے ہسدے ویکھے بُھلدا پر اک ہاسہ نئیں
لوکی کہندے پِچھلے ویلے سُورج دی دُھپ گھٹ جاندی
یار مِرے دا حُسن تے اج تک گھٹیا رتی ماسہ نئیں
دند چنبیلی، بُل گلابی کھو بیٹھن نہ کِدرے تاب
ایسے واتے اونے اج تک مَلیا کدی دنداسہ نئیں
یاری لان توں پہلاں بندہ سوچے بھانویں لکھاں وار
یار بنا کے دھوکھا دینا سجناں دا اے خاصہ نئیں
جس نے دل نُوں غم نہ لایا نہ ہی آہواں بھریاں نیں
بُڈھے وارے وی اُس بندے پھڑیا ہتھ وِچ کاسہ نئیں
جس شے تے وی حق اے اپنا لے لینی اے دعوے نال
حُسن دی وی خیرات نئیں منگنی کرنا اگے کاسہ نئیں
چنگے ماڑے دے وِچ نظری آ جاندا اے فرق ظفر
جیہڑا چُبھے پنڈے نُوں او کھدر ہُندائے ٹاسہ نئیں
عبدالمجید ظفر
No comments:
Post a Comment
Note: only a member of this blog may post a comment.