جدید پنجابی شاعری
جے بندہ نمک حرام ہووے تے کی کرِئیے
ہر تھاں بُرائی عام ہووے تے کی کرئیے
ساڈے سِر تے اُچا شملہ اے، سردار وی ہاں
دِھی چوک دے وچ نیلام ہووے تے کی کرئیے
ایہناں سڑکاں توں وزیر کوئی جد لنگھدا اے
ہر تھاں ٹریفک جام ہووے تے کی کرئیے
جِیدا دھن دولت جاگیر تے نالے کُرسی اے
اوہنوں کُل جگ دا سلام ہووے تے کی کرئیے
ایتھے ٹی ٹی تے بندوق وکھاندے سارے نیں
ہر گل تے قتلِ عام ہووے تے کی کرئیے
جینوں پتا ای نئیں شریعت دا، طریقت دا
اوہ ساڈا جد امام ہووے تے کی کرئیے
میرا سارا فن اے اوہدے لئی بس اوہدے لئی
اوہدے دل وچ غیر دا نام ہووے تے کی کرئیے
ایتھے چَن سُورج تے تارے سارے اوسدے نیں
ساڈی شام توں پہلاں شام ہووے تے کی کرئیے
رفعت انجم
No comments:
Post a Comment
Note: only a member of this blog may post a comment.