جدید پنجابی شاعری
پنجاب وچ سیلاب
قلم دی شوخ روانی چُپ اے
حرفاں دہ حیرانی چپ اے
ہر کوئی کردا شور سیاپا
پنڈ نوں روڑھ کے پانی چپ اے
بُڈھے پیؤ دی میّت رُڑھ گئی
گھبرو جوش جوانی چپ اے
شام سویرے اُلّو بولن
کوئل کیوں مر جانی چپ اے
ہاسے مُک گئے، اتھرُو سُک گئے
اکھیاں وچ حیرانی چپ اے
نوِیاں نسلاں سانجھ نکھیڑی
یار دی پگ پُرانی چپ اے
وچ قبراں دے دیس دی حالت
ویکھ کے دیس دا بانی چپ اے
سوچاں روون، ساہ کُرلاوے
کیسی ایہہ انجانی چپ اے
ہیر تے رانجھا وِچھڑن لگے
ایس توں بعد کہانی چپ اے
عدل انصاف وی گٗونگا ہویا
ویکھ کے کارستانی چپ اے
لوکی دھرنے، مرنے پئے گئے
دیس دا راجا رانی چپ اے
اج الطاف دے شعر پُکارن
لوکی کہن زبانی چپ اے
الطاف بخاری
No comments:
Post a Comment
Note: only a member of this blog may post a comment.