پنجابی سرائیکی شاعری
سنسکرت
تھوڑے لوکیں دی زبان اچ ڈھیر لکھن دی سزا وچ
شاعر کلہا رہ ویندے
جتلے توڑیں اکھ بھوینداں کُجھ نظردے تاں کلہیپا
کج نئیں ڈسدا تاں کلہیپ
میں وی کلہا رہ گیاں
اتنا کلہا کوئی میڈے پیر دی دنز تک وی نئیں پجیا کڈاہوں
نہ کوئی پجسے کڈاہوں
اتنا کلہا اتنا کلہا اتنا کلہا
معنی دی کنوارگی توں نظماں کوں آزاد کُئی نہ کر سگیا
کوئی میڈی شعریت وچ جی سگیا نہ مر سگیا
نہ کڈاہوں جیسے نہ مرسے نہ کُئی پورا اترسے
تھوڑے لوکاں دی زبان اچ کوئی نئیں جیندا کہیں کیتے
کُئی نئیں مردا کہیں کیتے
ڈھیر لوکاں دی زبان اچ
تھوڑا لکھن والیں کوں وی دیو دا درجہ ملیے
جتنے توڑیں اکھ بھوینداں، دیھ نظردن دیھ ہزار
تے انہاں دیاں جھولیاں وچ
شہزادیاں شہزادے کئی ملوکاں کئی ملوک
بد سلوک
وال کھلواون تے خوش
ٻال ڄنواون تے خوش
راز تاں او کھول نئیں سغدے جہانی
نہ قرانی نہ ایمانی
بس بُتانی و رمانی راز ہن
انہاں دے کول
انہاں دی دنیا ھ گول
گول ھ ہر چیز انہاں دی جھوک وچ
شعر وکدے پن انہاں دے تھوک وچ ٹوک وچ
تھوڑے لوکیں دی زبان اچ
ڈھیر لکھن دی سزا وچ شاعر کلہا رہ ویندے
میں وی کلہا رہ گیا ہاں
بے ملوکا! بے ملوک
بدسلوک
مژدم خان
No comments:
Post a Comment
Note: only a member of this blog may post a comment.