جدید پنجابی شاعری
اکھ گُلفام حقیقت ویکھی اک اندازے پچھے
مینوں کوئی ویکھ ریہا سی بند دروازے پچھے
میں تے اوہدے ریجھ پٹولے میلے ہون نا دِتے
خورے کِس دا ہتھ اے اوس دے روسے تازے پچھے
جیہڑے انتم دھاہاں تیکر نفرت کردے رئے نے
اج اوہ دیکھو ٹُردے آؤندے یار جنازے پچھے
اوہنوں کوئی خُش فہمی اے خورے اپنے بارے
اصلی چہرا ویکھ لئے پر میں تے غازے پچھے
راتیں خاب چ تکیا اکرم میں انہونا منظر
ساری خلقت دوڑ رہی سی اک آوازے پچھے
اکرم باجوہ
No comments:
Post a Comment
Note: only a member of this blog may post a comment.