جدید پنجابی شاعری
دل چندرے دے خالی ورقے شام سویرے تھلّاں
نہ ہُن تیرے فوٹو دِسن نہ ہُن تیریاں گلّاں
شہدوں مِٹھڑے پل سی جہڑے تیرے نال گزارے
تیرے باجھوں اِنج ہوئے آں جیوں تُمے دیاں ولّاں
دریاواں دی وستی دے وچ کچے گھر نیں ساڈے
ہر پَل اِیہو ڈر رہندا اے ڈھا جاون نہ چھلّاں
دُھپاں دے وچ ٹُر ٹُر سجناں مُڑھکا آ گیا تینوں
جی کردا اے کول بٹھاواں نالے پَکھیاں جھلّاں
اک پرانی یاد پئی ہے، اک پرانی چِٹھی
نہ آکھیں تے چُپ بیٹھا ہاں جے آکھیں تے گھلّاں
صغیر تبسم
No comments:
Post a Comment
Note: only a member of this blog may post a comment.