جدید پنجابی شاعری گیت
گل سن چپنا
راج لیا اپنا
وڈیاں وڈیریاں دا
ظالم لٹیریاں دا
چھڈ نؤں جپنا
گل سن چپنا
راج لیا اپنا
سراں دیاں پوتیاں نے
پوتیاں پڑوتیاں نے
ریگناں دے طوطیاں نے
کچھ تینوں دتا وی ایویں پیاں ٹپنا
گل سن چپنا
راج لیا اپنا
بندے نہیں ایہہ پیار دے
ایویں تینوں چاردے
جھوٹھ پئے ماردے
ہوش کر پاگلا چل، پا کھپ نا
گل سن چپنا
راج لیا اپنا
گورے چٹے صاحباں کولوں
کالیاں نواباں کولوں
بچ ایہناں عذاباں کولوں
نہیں تاں تینوں مُدتاں پئے گا کلپنا
گل سن چپنا
راج لیا اپنا
حبیب جالب
No comments:
Post a Comment
Note: only a member of this blog may post a comment.