جدید پنجابی شاعری
جس دا نیک خمیرا اے پترا
اس دا ٹھیک ضمیر اے پُترا
چلے جے کر تِیا اکھیں دا
سینہ جاندا چِیر اے پُترا
ہر ڈاہڈے توں ڈاہڈی ویکھی
ناں جس دا تقدیر اے پُترا
فضل کرے جے فضلاں والا
فِر چلدی تدبیر اے پُترا
ہر اک دا بُت سوہنا رانجھا
ہر اک دی روح ہیر اے پُترا
جیہنے صاف لنگوٹا رکھیا
اوہ خود دار فقیر اے پُترا
باقی سارے بُھلے پِھردے
اِکو ذات کبیر اے پُترا
جو لایا حسنینؑ دے بابے اوہ
نعرۂ تکبیر اے پُترا
بھاویں سال ہزار اے زندگی
اؤنا موت اخیر اے پُترا
دُنیا تے ہر مؤمن بندہ
خالق دی تصویر اے پُترا
ایہہ جہڑی میں کوشش کیتی
ناں تیرے تحریر اے پُترا
سیف مرید ای پیر علیؑ دا
جو پیراں دا پیر اے پُترا
سیف باجوہ
No comments:
Post a Comment
Note: only a member of this blog may post a comment.