جدید پنجابی شاعری
نہ زحل مریخ دا کراں شکوہ
نہ مداح سعدین سما دا ہاں
نہ میں آب حیات دا ہاں تسا
طلب گار نہ سایۂ ہما دا ہاں
ککھ تیغِ فناہ دا خوف نہ ہی
نہ مشتاق گلزار بقا دا ہاں
نہ میں فہم و ذکا دا ہاں بھکھا
نہ درویش جنون و سودا دا ہاں
باطل روپ عیار دیاں چوکھٹاں تے
نہ میں عادی فغاں و بكا دا ہاں
شعر سخن دا رتی گھمنڈ ناہیں
نہ پروانہ چراغ ادا دا ہاں
نحو صرف تے حرف دا پتہ ناہیں
دامن گیر نہ کسے علمأ دا ہاں
پڑھی اک بھی نئیں قضا کئی
بنیا پُتلا ہی گویا قضا دا ہاں
کوئی پتہ نشیب و فراز دا نئیں
مد و جزر نہ کسے دریا دا ہاں
نہ میں ہو عاجز کدے عجز کیتا
ناہیں کبر بھانویں کبریا دا ہاں
خریدار نہ شرح دے موتیاں دا
پچھنہار نہ عشق دے بھا دا ہاں
نہ میں سائل نمود و نمائشاں دا
نہ میں قائل زبانی دعا دا ہاں
میری سمجھ بے سمجھاں نوں آونی اے
سمجھ دار بے سمجھ بلا دا ہاں
پھر بھی منزلت ملی ابلیس دی نہ
کھچدا خطاں تے خط خطا دا ہاں
غنی ہاں ایسا پلے ککھ ناہیں
نہ محتاج امیر و امرا دا ہاں
اگ دوزخ دی نال نہ دشمنی اے
سجن نال جنت دلکشا دا ہاں
اوہ ہاں کافر کر سٹاں شہید مومن
ناں شہید تیغ اشقیا دا ہاں
وڑاں وچ گلزار تے چیخہ بندی
جھونکا سرد کافور ہوا دا ہاں
خبرے بندگی تے کیوں نہیں جی کردا
میں بھی بندہ تے اسے خدا دا ہاں
سدھا جاواں نقاریاں وجدیاں وچ
ایسا سامع بانگِ درا دا ہاں
سِدھیاں پُٹھیاں منظور تائیں
عاصی شافع روز جزا دا ہاں
آؤ عاشقو! چُم لو قدم میرے
دائم سگ کُوئے مصطفٰیؐ دا ہاں
دائم اقبال دائم
No comments:
Post a Comment
Note: only a member of this blog may post a comment.