جدید پنجابی ہندکو شاعری
باہر بی شور اے اندر بی شور
مست الست دی دیکھو ٹور
جتیا بازی سچ دا زور
تکدے رہ گئے سب کمزور
شور مچاون دیکھ چکور
صابر شاکر نا کجھ ہور
مست الست دی دیکھو ٹور
رب دے عشق دا مٹھا ڈنگ
نالے فقر دا چولا سنگ
مچیا شور کہ ہولی لنگ
نئیں تا شور مچاسن مور
مست الست دی دیکھو ٹور
عشق دیاں آ رمزاں کھول
نالے بول تو نویں بول
کناں دے وچ رس وت گھول
اگ وچ شور مچاون پہور
مست الست دی دیکھو ٹور
جس ویلے او ٹُریا پار
ہو گئی جمع وچ دربار
بنڑ کے خلقت اُس دی یار
خلقت دے نل نچ پئے مور
مست الست دی دیکھو ٹور
بلبل جکرو ڈال و ڈال
اسراں تو ویں مست خوشحال
جنتاں دے وچ مالا مال
ودھ گئے ناز تے نخرے ہور
مست الست دی دیکھو ٹور
پورے ہو گئے سارے خواب
چادر ڈیوے لال گلاب
لے کے آئے آں دیکھ جناب
جمع سارا شہر پشور
مست الست دی دیکھو ٹور
منیا رہسی عشق اخیر
بنڑ کے تیرا میرا پیر
نالے دونوں دی جاگیر
جس وچ شامل کوئی نہ ہور
مست الست دی دیکھو ٹور
تیرے عرس تے سال پہ سال
نانگے پیر فقیر تہمال
پانڑے آسن نال و نال
عرشاں تے بی ہویا غور
مست الست دی دیکھو ٹور
مُک گئے ساہ اج ساہ نہ کوئی
ساڈا اج وساہ نہ کوئی
نالے سانوں راہ نہ کوئی
یار امداد دی چھوڑو گور
مست الست دی دیکھو ٹور
صابر حسین امداد
No comments:
Post a Comment
Note: only a member of this blog may post a comment.