جدید پنجابی شاعری
جد دا ویڑا وکھ ہویا اے
پیپل دی ہُن چھاں نہی لبھدی
پُتّر نوں ہُن ماں نہیں لبھدی
جدّ دا ویڑا وکّھ ہویا اے
دُوروں ویکھ کے ہتھ ہِلانے آں
تے نالے انج جیویں بیگانے آں
جّد دا ویڑا وکّھ ہویا اے
روٹی بُکھّ مٹاندی نہی
تے بے بے عید مناندی نہی
جدّ دا ویڑا وکھ ہویا اے
سارے ویر دھرتی وکھری واہندے آں
اک دُوجے دے گلمے تک جاندے آں
جدّ دا ویڑا وکھ ہویا اے
سارا ٹبّر وی کٹھیاں بیٹھا نہی
اک دُوجے نوں رج کے ویکھا نہی
جدّ دا ویڑا وکھ ہویا اے
روز مرن نوں جی کردا اے
ویر منان نوں جی کردا اے
جدّ دا ویڑا وکھ ہویا اے
دادا روندا رہندا اے
سانوں تانگدا رہندا اے
میری منّو تے گھر نوں چلو
کلّیاں رہن چ فیدا نہی
رولے پان چ فیدا نہی
ماں گوان چ فیدا نہی
بھِرا رُسان چ فیدا نہی
کلّیاں زندگی تاں ٹپ جاوے گی
پر دُکھّاں وچ کھپ جاوے گی
جدّ ویڑا وکھ ہو جاندا اے
سب کُجھ ککھ ہو جاندا اے
سلمان بشیر
No comments:
Post a Comment
Note: only a member of this blog may post a comment.