جدید پنجابی شاعری
پُکھ نیں دِتے بچے رول
خاناں! ہُن تے اکھاں کھول
ساڈے گھر وِچ آٹا کوئی نئیں
تیرے گھر وِچ گھاٹا کوئی نئیں
ساڈے ویہڑے دے وِچ آ کے
پُکھ وجوندی فردی ڈھول
خاناں! ہُن تے اکھاں کھول
کلی جان ہزاراں پنگے
مالک نِت کرایہ منگے
شام سویرے بُوہے اگے
بول کے جاندا مندے بول
خاناں! ہُن تے اکھاں کھول
لبھیا کِنی وار میں نئیں لبھیا
باراں چھڈ ہزار نئیں لبھیا
ساڈی گل جے جُھوٹی لگے
آ کے ساڈا کھیسہ پھول
خاناں! ہُن تے اکھاں کھول
وِچ دُکاناں لُٹی جاندے
لوکاں دا گل گُھٹی جاندے
دونوں دون روپئیے لے کے
دیندے نئیوں پورا تول
خاناں! ہُن تے اکھاں کھول
پُکھ نیں دِتے بچے رول
اسلم عارفی
No comments:
Post a Comment
Note: only a member of this blog may post a comment.