جدید پنجابی شاعری
جنہاں دیدیاں نے تیری دید لٹی جھات ہور دے پا نہ سکدے نے
تیر نظر تیری دے مجروح پنچھی کدھرے اُڈ کے جا نہ سکدے نے
تیرے عشق فیاض دی اگ وچوں لبھی سدا بہار گلزار مینوں
میرے دل دیاں داغاں دے کھڑے ہوئے پھل کدی مرجھا نہ سکدے نے
ڈگن جو آسماناں توں، اوہناں تائیں زمیں ڈگدیاں سار پڑچھ لیندی
گر جان جیہڑے تیری نگہ وچوں کدھرے پیر جما نہ سکدے نے
اک ہتھ دے نال وجا تاڑی تیریاں عاشقاں لوکاں نوں دس دتا
توں جنہاں نوں کدی نہیں یاد کیتا تینوں کدی بھلا نہ سکدے نے
اینویں تاہنگ دیدار دی رکھ بیٹھائے میرے دلِ نادان نوں کون آکھے
خواباں وچ جو آون توں شرم کردے باہر پردیوں آ نہ سکدے نے
وجے ہوئے زباناں نوں جندرے نے لگی لباں آتے مہر چپ دی اے
جنہاں کول اے چج دی گل کوئی کوئی گل سمجھا نہ سکدے نے
فضل جس بھاگاں والے اک واری اوہدے وسدے کوچے دی سیر کیتی
واعظ ذکر بہشت دا چھیڑ کے تے اوہدا دل پرچا نہ سکدے نے
پیر فضل گجراتی
No comments:
Post a Comment
Note: only a member of this blog may post a comment.