جدید پنجابی شاعری
اے مُکھڑے نیں کہ شیشے دیکھدا جا
لکھے اناں تے دُکھڑے دیکھدا جا
کوئی دل ہووے پہاویں چن چمکے
چوفیرے اس دے ہالے دیکھدا جا
کوئی سُورج بنیں تے کوئی تہرتی
عدم تُوں آندے ذرّے دیکھدا جا
جِناں شہراں دے نقشے نیں میرے خاب
اے بنڑدے نیں کہ ٹُٹدے، دیکھدا جا
اتھے جو کُج بی ٹُٹدے اگے پچھے
تو اپڑے آسے پاسے دیکھدا جا
جتھے دو چار بُوٹے نیں پرانیں
کدی اناں دے سائے دیکھدا جا
زمی اسمان بدھے نیں جناں نے
کدی تا تو اووی رشتے دیکھدا جا
نویں تعمیر کردا جا برے توں
پرانیں سارے نقشے دیکھدا جا
اے دل آزاد ہو پانیں اجے تک
بڑے نیں اس دے پنجرے دیکھدا جا
کوئی تہذیب آئی تے کوئی گئی
اتھے ارے زمانے دیکھدا جا
پچھانڑ ہوندی اے نئیں شکلاں دی اتھے
ذرا انے سویرے دیکھدا جا
اے سُورج آنیں توں پیلے دا منظر
تے رُخصت سوندے تارے دیکھدا جا
تیرے دُشمن تے تنوں ویکھدے نیں
تُوں جاوید اپڑے پیارے ویکھدا جا
جاوید احمد
No comments:
Post a Comment
Note: only a member of this blog may post a comment.