جدید پنجابی شاعری
ڈھول ہجر دا گل اچ پانڑاں سوکھا نئیں
لوکاں نوں ایہہ درد سنانڑاں سوکھا نئیں
ہو گئی آں برباد زمانے دے ہتھوں
میں اُجڑی نوں گل نال لانڑاں سوکھا نئیں
جیہڑا دل اچ پیر جما کے بہہ جاندا
اوہنوں تاڑی مار اڈانڑاں سوکھا نئیں
مانڑ وی رکھڑاں پیندا ہر اک وَل دا اے
سِر دے اُتے پگڑی پانڑاں سوکھا نئیں
اس دھرتی دا والی رب رسول جو اے
اس دھرتی نوں چُونا لانڑاں سوکھا نئیں
میں جھلّی اے ڈونگھی سَٹ وچھوڑے دی
ملبہ ہجر دا سِر تے چانڑاں سوکھا نئیں
اوہنے جد دا اوہ محلہ چھڈیا اے
اوس محلے آنڑاں جانڑاں سوکھا نئیں
انّہاں ہونڑاں وانگ زلیخا وی اوکھا
یوسف وانگر قول نبھانڑاں سوکھا نئیں
پا کے پیریں گھنگھرو سارے نچ لیندے
بلھے وانگر یار منانڑاں سوکھا نئیں
وچ کربل دے سارے لعل لٹا دتے
پڑھ کے کلمہ دین بچانڑاں سوکھا نئیں
رفعت انجم
No comments:
Post a Comment
Note: only a member of this blog may post a comment.