جدید پنجابی شاعری
ہڑھ ہنجواں دا
دھرتی چوں پانی پُھٹّیا، امبراں وچ ہو گئے چھیک
سانوں دوہاں پاسیاں روڑھیا، اسی کِنّوں آکھیے نیک
بَنّیاں نیں چِیکاں ماریاں، اتے کھال کھلو کے رون
نہراں دے اتھرُو ڈُلھدے ، جد ہاڑے اُچّے ہون
چھتّاں نے بُلکاں کیریاں، پرنالے نیر وہائے
چُلھاں نیں ساہواں ڈکّیاں، تندوری غوطے کھائے
دُکھ نال رسوئی بُسک دی اتے کنکاں کردیاں وین
ساڈے ست پراگے اُجّڑے، بُھکھ نال کلیجے ڈھہن
پانی دے ہتھوں سہم کے ساڈے بال معصوم ایان
ویہڑے دا چھپّڑ تَر کے، گلیاں وچ رُڑھ دے جان
پانی دی قاتل کالھ نوں جان اُتّے جر گیّاں
نہراں دیاں تارُو مجّھیاں کِلّیاں تے مر گیّاں
اَسی ہَڑھ دے ہَلّے جھل لئے، اساں چِتّھ کے رکھے بُلھ
اسیں ڈِگ کے مِٹّی چَٹ لئی جد گارا ہو گئی چُلّھ
کیدو تے کاہدیاں لعنتاں، اج دونویں رَل گئے نیں
اسی کیہڑی پوتھی پھولیے، سب ورقے گَل گئے نیں
شہزاد نیر
No comments:
Post a Comment
Note: only a member of this blog may post a comment.