جدید پنجابی مزاحیہ کلام
میرے ایس غم دا اپاء کیوں نئیں کردے
میرا ہن چھیتی نال ویاہ کیوں نئیں کردے
کدی لوکی کہندے سن؛ گھبرو جوان آن
ہن تے خیال کرو میں وی انساں آں
لمیاں کہانیاں چ پے نئیں سکدا
کلیاں جے آکھو وی تے رہ نئیں سکدا
مامے چاچے پھپھیاں نے سبھ نوں ویاہ دتا
میری واری تسی ایس گل نوں دبا دتا
میری گل میرے دل وچ رہ گئی اے
میری واری ساریاں نوں موت پے گئی اے
اپنے پرایاں والے بھید سبھ کھل گئے
اسی فیر عید اتے کلیاں ای رل گئے
موٹے آن تے فیر کی اے ایہوں سمجھانے آں
کسے دے پیو دے کولوں لے کے تے نئیں کھانے آں
ساڈے جیہے کئی متوالے وی تے ہوندے نے
کالے آں تے فیر کی اے کالے وی تے ہوندے نے
سچ پُچھو لوکاں دیاں سوچاں اتے جالا اے
لیلیٰ وی تے کالی سی، اوباما وی تے کالا اے
ایویں کسے گل اتے اڑنا فضول اے
جنج دی وی کُڑی ہووے قبول اے قبول اے
طاہر شہیر
No comments:
Post a Comment
Note: only a member of this blog may post a comment.