جدید پنجابی کلام
ماں
شِکر دپہر دی بلدی دُھپ وچ وانگ سی ٹھنڈی چھاں
دُنیا اُتے رُوپ سی رب دا، کرماں والی سوہنی ماں
ٹُر گئی رب کول چُپ چپیتی دل دی کوئی گل نہ کیتی
کی دساں جو میرے تے بیتی، ہُن کس نوں آکھاں ماں
اودے باج نہ ویڑہا سجدا، دل ایتھے نئیں میرا لگدا
اودیاں تھوڑاں ہر ویلے مینوں کتھے کتھے یاد کراں
سرگی ویلے جد آکھ کُھلدی تکیا اوہنوں رب آگے چرھدی
خیراں سی بچیاں دیاں منگدی، واسطے پاک نبیؐ دے ناں
جہڑے ایس جہان توں جاندے فیر کدی نئیں پھیرا پاندے
موئے تے وچھڑے مُڑ نئیں آندے ایس دل نوں کویں سمجھاں
یار سعید! رضا سی رب دی اے واری تاں آنی سب دی
تُوں وی ایتھے بیٹھ نئیں رہناں، دُنیا اے اک سراں
ارشد سعید
No comments:
Post a Comment
Note: only a member of this blog may post a comment.