جدید پنجابی شاعری
ساڈے ویڑے جوگی آیا بنی مصیبت بھاری اے
پیکے گھر وچ کد تک رہناں آج سسرال تیاری اے
غسل دیو مینوں جوڑا پاؤ، عطر تے کافور لگاؤ
کہنا منو جوگی دا جس ڈولی آن کھلاری اے
جو چاہندا او آپے کردا، نہ کوئی جیندا نہ کوئی مردا
صدقے جائیے اس سوہنے دے جس دی شان نیاری اے
اُچے نیویں اوکھے ڈاہڈے پردیساں دے پینڈے نیں
جے جانا سی تے فیر کاہنوں بہہ کے عمر گزاری اے
اون والے نیں ٹُر جانا، جس نے جانا مُڑ نئیں آنا
دسن والی گل نیں کوئی، جِتی بازی ہاری اے
اوتھوں اُڈ کے ایتھے آئے، اج ساہنوں او دیس بلائے
او وی اک اُڈاری سی تے ایہہ وی اک اُڈاری اے
لے چلو مینوں ڈولی پا کے، روون بھیناں، ویر نہ ماپے
اللہ حافظ کر لو واصف! سب دی آنی واری اے
واصف علی واصف
No comments:
Post a Comment
Note: only a member of this blog may post a comment.